martedì 22 giugno 2010

IO VULESSE TRUVA' PACE









Io vulesse truvà pace;


ma na pace senza morte.


Una, mmieze'a tanta porte,


s'arapesse pè campà!


 


S'arapesse na matina,


na matin' 'e primavera,


e arrivasse fin' 'a sera


senza dì: "nzerràte llà!"


 


Senza sentere cchiù 'a ggente


ca te dice:"io faccio...,io dico",


senza sentere l'amico


ca te vene a cunziglià.


 


Senza senter' 'a famiglia


ca te dice: "Ma ch' 'e fatto?"


Senza scennere cchiù a patto


c' 'a cuscienza e 'a dignità.


 


Senza leggere 'o giurnale...


'a nutizia impressionante,


ch'è nu guaio pè tutte quante


e nun tiene che ce fà.


 


Senza sentere 'o duttore


ca te spiega a malatia...


'a ricett' in farmacia...


l'onorario ch' 'e 'a pavà.


 


Senza sentere stu core


ca te parla 'e Cuncettina,


Rita, Brigida, Nannina...


Chesta sì...Chell'ata no.


 


Pecchè, insomma, si vuò pace


e nun sentere cchiù niente,


'e 'a sperà ca sulamente


ven' 'a morte a te piglià?


 


Io vulesse truvà pace


ma na pace senza morte.


Una, mmiez' 'a tanta porte


s'arapesse pè campà!


 


S'arapesse na matina,


na matin' 'e primavera,


e arrivasse fin' 'a sera


senza dì: "nzerràte llà!"


E. De Filippo



4 commenti:

  1. una canzone decisamente utopistica! ;)un abbraccio grande!

    RispondiElimina
  2. decisamente :-)un abbraccio grande anche a te!

    RispondiElimina
  3. buon finesettimana!!!e ripigliateeeeeee!!!!!!!!!!!abbraccio

    RispondiElimina
  4. ho un piano di recupero;-)comincia con almeno 12 ore di sonno...che sono stravoltapoi può iniziare il we!!!!buon fine settimana anche a te

    RispondiElimina